الطــــــائفية المقيتة
د. العبيدي
زميلة ويايه بالكلية متعرفني ولاأعرف منين هيه
أسمهه فاطمة شابة حلوة ومثقفة ومؤدبة ومثالية
علاقتنه علاقة زمالة وتحولت الى علاقة عاطفية
تعلقت بيهه وتعلقت بيه وجمعتنه قصة حلوة وغرامية
عرفتني منين أصلي وآني هم عرفت منين هيه
المهم يجمعنه الوطن ومايفرقنة مضمون بالهوية
جنه نزور النجف ومن نرجع نزور الحضرة القادرية
نروح لبيت عمهه بكربله ونرجع لعمي بالاعظمية
ونزور خالهه بالرمادي وراها نزور خالي بالكاظمية
وظلينة راي واحد وكلب واحد ونمشي بفرد نية
لكن بعد الاحتلال رجعت عمتهه من ايران مليانة انانية
سمعت بنت اخوهه تحب شاب اسمه عمر من ملة سنية
صبت كل غضبهه وصرخت حيل ولج ذولة وهابية
وللاسف تسممت افكار فاطمة وصارت افكار رجعية
ومثل متشوفون صارت طائفية آني سني وهي شيعية
آني جاري الأمام الأعظم وهي من الكاظمية
يعني بس جسر الأئمه بيني وبينهه هيه
وللاسف بحصار الفلوجة الأدبسز ماسألت عليه
خابرتهه وعاتبتهه وكلتلهه ولج ليش ياطائفية
كالتلي كرهتك لان انته تقاوم جونسون وكلاوديه
ذوله خلصونه من حكم البعث وعهد العبودية
كلتلهه ولج ماتدرين شراح يصير بيج وبيه
راح يفرقونه ويهزموج انتي لمصر وآني لسورية
ذوله هدفهم نركع آني وياج للحملة الصليبية
كلتلهه شنو الي صار نسيتي بعجل وبدلتي عليه
ردت علي تكول عمر مو انته سني وآني شيعية
جاوبتهه وبحزن...ولج أحنه مو وحدة اسلامية؟
ردت علي تكول ولك العب غيرهه شجابك عليه
كلتلهه ليش مو انتي اخلاق وثقافة وتربية اسلامية
كالت آني مهري عالي ونيشاني غالي وماتكدر عليه
كلتلهه روحي تصير مهرج ونيشانج عيوني ألج هدية
آني زادي اخلاقي ماقيمج بالذهب مخلص وتدرين بيه
كالت اذا تحبني مهري تصير شيعي وتلطم ويايه يومية
كلتلهه بويه انتم مجموعكم عالي ومعدل مجموعة طبية
وانا مجموعي مايدخلني لمعهد ويمكن ابقه بالأعدادية
ولج هذا مبدأي ماأغيره ولو تصيرين ليلى العامرية
كلتلهه زيييين ليش ماتتحولين انتي تصيرين سنية؟
ردت علي بغضب وكالت ياوهابي تسويني ناصبية؟
جاوبتهه بكل حنية....... كبر لفج ولف كل الشعوبية
أنتي هم طايح بأيدج تتعلمين أصول الدين بكل معانيه؟
ولج حب أهل بيت الرسول وصحابته رحمة ألاهية!
وبعد لحظة صمت أثنينه خجلانين وروسنه محنية
خنكتني عبرة عليهه وحجيت وياها برقة وحنية
كلتلهه آسف يافاطمة يمكن جرحتج حسبيهه عليه
التفتت علي وكالت لاتهتم ياعمر انت مني وبيه
آني الأعتذر منك بكلامي جرحتك من سودة عليه
آني آسف وانتي آسفة بس تبقة المشكلة هيه هيه
وراح نبقة آني السني عمر وانتي فاطمة الشيعية
مثل ماصارت الصلاة ناس تسَبّل وناس مثنية
وصار الآذان حي على خير العمل والباقي منية
وصارت الأئمة هذا مرجع وهذا هيئة اسلامية
وصرنه حزب اسلامي ومجلس أعلى وشلة صدرية
وغيروا حتى المساجد والجوامع وصارت حسينية
وراح نبقة مثل ماأحنه آني سني وانتي شيعية!!!
كامت فاطمة والدمعة بعينهه والعبرة مخفية
كالت ياعمر احنه شعلينه احنه تجمعنه الحمية
كلتلهه بصوت يرجف هذه والله خطة فارسية
شعدنه غير العراق ولج هو الروح والرية
شفت دمعتهه تصب مثل النهر وتباوع عليه
وتهمس لاوالله غالي الوطن والغيرة عراقية
آني دجلة الحنينة وانته الفرات العذب ميه
ولك كافي بعد تكول انت سني وآني شيعية
لازم نذم هالطائفية وحبي الك اجمل هدية
يعني صدك الفرح يرجع للعراقي وللعراقية؟
مو خلصنا العمر خصة بأثر غصة وطفحت الرية
شجعني كلامهه وطلبت طلب وماظن تبخل عليه
كلتلهه فطومة ممكن بوسة من هالشفايف العسلية؟
جان ترد علي بكل هدووووء ومودة ورقة وحنية
ياسني يامسوس ميفيد بيك الا القلع يبن الوهابية
رديت عليهه وبكل لطف.. ياشيعية ياثولة ياحية
يللي وجهج ورم من اللطم بالقرايات يومية
وعيونج صفن حولات من البجي بالكاظمية
ورجعنه نتعارك من جديد آني سني وهي شيعية!!!
ورجعت حبيبتي بعد اتعس من قبل رجعت طائفية
وهنيالك ياعراق حتى الحب صار بيك مذهبية
وكبل ماتسأل عنهه لازم تسأل هي سنية لو شيعية؟
الله عالي ياعمر اتوكل عليه وروح دور وحدة كردية
توكلت بكل ثقة وايمان والصدفة خدمتني وحنت عليه
عندي صديق أسمه كاكه حمه بعكد الكراد كلتله رايد بنية
كال ابشر كاكه عمر نخطبلك جارتي بنية كردية
شيلان بنت ناس فقره واهل رحم وحقهم عليه
رحنه لبيت ابو شيلان واني فرحان حتى نشوف البنية
لن شيلان فلعة كمر وشعر حرير وشفة وردية
طرت من شفتهه ونسيت حتى فاطمة التتعزز عليه
شيلان ابوهه من دهوك وامهه من السليمانية
سألوني انته منين كلتلهم آني سني وامي علوية
آني عبيدي وجدي علي العاصي وأسألو عليه
وجدي ابو امي سيد وعمامته تكول ملوية
كالوا هذا كله مو مهم الأهم تتغير القومية
لأن ذولة العرب مو بشر كاضيهه عراك يومية
تعال وشوف كردستان صارت جنة محمية
بظل اسرائيل كلنه نعيش وشوف شلون حرية
شوف اربيل صارت تل ابيب واحسن شوية
أرعبني هذا الي سمعته وشل ايدي ورجليه
وطلعت خجلان من نفسي لأن ذولة عراقية
وفوضت امري للواحد وهو يعرف النية
وياحيف الوطن لك صار بيت الأنتهازية
سوهه مثل مارادوا عجمية ويهودية
بشمال الوطن موساد اسرائيل محمية
حتى العلم غيروه بنجمة صفرة جنهه سم حية
وبالبصرة شط العرب الفرس نشفوه وسمموا ميه
وبالجنوب اتباع رستم يردوهه فردة رالية
ولك ياحيف الوطن اصبح بيد الحرامية!!!
بس تبقة العيون على الزلم تنتظر جية.
*******
قطعة مقتبسة
ويظل عالي العراق وعالية أسوارة
وعلى حدودة الزلم عالتفك نطارة
لابيهم مضيفة تنطفي ناره
ولابيهم يرد مهضوم خطارة
ذب للكهوة هيل وزيدهه يحمود
ولاتنطي كهوة للماحمه دياره
ولاتنطي كهوة للماحمه دياره
ليست هناك تعليقات:
إرسال تعليق